اتغلبنا كلنا بس بردوا بحبك

انا يمكن واحد مش مشهور ومش معروف بس انا واحد من ضمن الشباب اللى فى البلد دى اتظلم واتسلب حقوا مبسوط ومرتاح بس مقدرش انسى انى عمرى ما اخدت حقى فى مصر حتى ابسط الحقوق انى اقول لا ممنوعه بدايه من تحقيقات ممنوعه من النشر وافلام رقابه تمنعها لانها تضر بالامن العام وحتى حلمى ممنوع مابكرهش مصر لانى فى حاجات كتير ربطتنى بيها بدايه من امى وابويه واصحابى وحبيبتى وحتى النيل اللى اول حد كنت بجرى عليه لما حد يقسوا على او مصر تزعلنى اروح واشتكيلوا انا نزلت الاعتصام يوم 25 ويمكن انا كنت من اوائل الناس اللى اطلقت الحمله انا ومجموعه من اصدقائى اللى منهم اكيد طبعا انتوا فى ناس اتريقت وفى ناس احتجت وفى ناس اتشجعت بس الغريب فى الموضوع لما تلاقى شاب فى اوائل العشرينات ماسك عصايا وبيجرى وراك يضربك مايعرفش هوة بيضربك ليه فكرونى باحمد زكى فى فيلم البرىء لما مكنش يعرف ولما عرف اتصدم احنا كلنا لازم نعرف احنا بنتظاهر ليه وكلنا لازم نعرف احنا هانخرج ليه تانى وتالت ومليون اولا مصر فى تاريخها كلوا اللى علموة لينا فى المدرسه كان مزيف والحقيقه غير كده خالص ابسطها اننا عمرنا ماعملنا شىء على شان مصر دايما بناخد من مصر واى شىء يذكر فى تاريخها اتعمل اتعمل على شان مصالح شخصيه انما شىء لمصر وعلى شان مصر ماحصلش بس من حقنا احنا نبنى تاريخ للبلد دى من حقنا يتقال ان جيلنا هوة اللى حررها بجد ومن حقنا نقول ان مصر تحت حكم حاكم طاغيه وان احنا حررناها من حقى وحقك وحق اخويا واخوك اننا نقول اننا حررنا مصر بعد 7الاف سنه احتلال من طاغيه الى طاغيه حررناها ..............حررناها وجبنا لها حقها اللى جضر الاعتصام يوم الجمعه هايقول ليكوا ان احنا كنا شباب مظهرنا مشرف رغم الضرب والمهانه اللى اتعرضت ليها بس انا مبسوط وحتى لو كنت رجعت ميت اكيد كنت هابقى فى المكان اللى هاموت فيه مبسوط لما بشوف رئيس جمهوريه شعب بيختاروا ورئيس جمهوريه شعب بيمشيه واخر امه تتظاهر من اجل الاطاحه بيه واحنا ابويه واخويه امى اختى كلهم يعيشوا مبارك ويموتوا مبارك اكيد هابقى حزين عالحريه هابقى حزين لما الدنيا كلها بتختار واحنا مالناش حق الاختيار لازم بجد نكون كلنا مصر ننسى الصليب وننسى الاخوان المسلمون وننسى انصار السنه وننسى الصوفيه وننسى التبليغ والدعوة ونعمل حاجه على شان مصر مرة واحده بس على شان البلد دى لازم نخرج تانى وتالت ومليون انتوا عارفين انا يمكن بقالى 6سنين ما مشيتش فى تظاهر من ساعة ما خلصت الجامعه يعنى بس دلوقتى انا هاخرج تانى يوم الجمعه هاخرج وهشارك وهنادى بصوت مصر مش هاخاف من اى حاجه لانى لاول مره احس ان انا مبسوط فى البلد دى نفسى احكى تاريخ مش مزيف لابنى نفسى اقولوا ان لك الفخر بمصريتك نفسى اقولوا ان انا وشبابها اللى حررناها